Ukiakkut Ataatsimiinneq 2025

 

2025-mi Inatsisartut ukiakkut ataatsimiinnissaannut (UKA25-mut) oqaluuserisassat ullumi nassiussuunneqarput.

 

Aallarniutigalugu malugeqquneqassaaq ukiakkut ataatsimiinneq piffissanut marlunnut avinneqarsimammat, tassa UKA25 Imm. 1-imut aamma UKA25 Imm. II-mut.

 

Inatsisartut ukiakkut ataatsimiinnerat tallimanngornermi ulloq 19. september 2025 nal. 11.30 aallartissaaq 14. november 2025-llu tungaanut ingerlasussatut pilersaarutigineqarluni, tamatumalu kingorna UKA25 Imm. 1 unikkallassalluni, UKA25 Imm. II-p ulloq 26. januar 2026 sapaatip akunneranik ataatsimiititaliat ataatsimiiffiannik aallartinnissaata tungaanut. Ulloq 3. februar 2026 UKA25 Imm. II-mi Inatsisartuni ataatsimiiffiussaaq siulleq.

 

Apeqquteqaat aallaavigalugu oqallinnissanik siunnersuuteqarnissamut killissarititap ulloq 5. september 2025-p kingorna ullut ataatsimiiffiusussat siulittaasoqarfiup naleqqussartussaassavai, taamaattumillu aamma tamatuma malitsigisaanik ulluni ataatsimiiffiusussani ataasiakkaani immikkoortut oqaluuserineqartussat naleqqussarneqartarsinnaallutik. 

 

Taamaalilluni Inatsisartunut ilaasortanit immikkoortut nutaat katillugit 51-it Naalakkersuisunillu immikkoortut nutaat 30-t UKA25-mi suliarineqartussatut oqaluuserisassanut ilanngunneqarsimapput.

 

Ullut ataatsimiiffiusussat imatut agguataarneqarput:

 

Ukiakkut Ataatsimiinneq 2025 Imm. I aamma Ukiakkut Ataatsimiinneq Imm. II (UKA25 Imm. 1  aamma UKA25 Imm. II)

 

UKA25 Imm. I-imi Imm. II-milu ullut ataatsimiiffiusussat, UKA24-mi 26-iusimasut, katillugit 31-ussapput, ullullu ataatsimiiffiusussat sapaatip akunneranut ullunut ataatsimiiffiusunut pingasunut sisamanulluunniit agguataarneqassallutik. Qulliunerusumik pilersaarut imatut isikkoqarpoq:

 

·     Ullut ataatsimiiffiusut nal. 11.00 aallartittassapput 16.00-illu tungaanut ingerlasassallutik, ulloqeqqanut unikkallartoqarani

·     Akunnerit naalakkersuisunut apeqquteqarfiusinnaasut pingasunngornikkut nal. 10-imiit 11.00-imut ingerlanneqartassapput, tamatumalu kingorna ataatsimiinneq nal. 16.00-ip tungaanut ingerlaqqittassalluni

·     Piffissami 11.00-imiit 16.00-imut sapaatit akunneranut ullut ataatsimiiffiusut pingasussaapput sisamaallutilluunniit

·     Oqaluuserisassat ingerlaavartuussapput – taamaalillunilu oqaluuserisassani immikkoortut ullormi ataatsimiiffiusumi naammassineqanngitsut ullormut ataatsimiiffiusussamut tullermut ullormulluunniit immikkut ataatsimiiffiusussamut ingerlateqqinneqartassallutik.  

 

UKA2025-mut tunngatillugu atortussat tamarmik www.ina.gl-imi takuneqarsinnaapput, oqaluuserisassanilu allannguutit nittartakkakkut pisartagarilerneqarsinnaallutik.

 

Inatsisartunut ilaasortat Naalakkersuisullu ataatsimiinnissaq sapaatip akunneranik ataatsimik sioqqullugu iluarsiissuteqarnissamik siulittaasoqarfimmut qinnuteqarnissamut periarfissaqarput, taamaattumillu oqaluuserisassani allanngortitsisoqartarsinnaalluni. Iluarsiissutit tamarmik nittartakkami ingerlaavartumik iluarsineqartassapput.

 

Ikinngutinnersumik inuulluaqqusillunga

 

Kim Kielsen