Inatsisartut Aalisarnermut, Piniarnermut Nunalerinermullu Ataatsimiititaliaata Tasiilami paasiassarsiorluni angalanera

Aalisarnermut, Piniarnermut Nunalerinermullu Ataatsimiititaliami amerlanerussuteqartut Tasiilami inoqarfiinilu paasisassarsiorlutik angalaqqammerput pissutsinik misissuiartorlutik innuttaasullu ajornartorsiutaat tusarniarlugit. Angalanermi ataatsimiititaliap Tasiilap eqqaani inoqarfiit tamaasa tikeraarpai; Isertoq, Tiniteqilaaq, Sermiligaaq, Kuummiut aammalu Kulusuk. Taamatuttaaq Tasiilami Royal Greenlandip aalisakkerivia ataatsimiititaliamit pulaarneqarpoq, tassanilu piniartut peqatigiiffiannit aallartitat kommunimilu inuussutissarsiornermut siunnersortit ataatsimeeqatigalugit.

Aalisarnerup piniarnerullu ataatsimut isigalugu ineriartortinneqarnerannut atatillugu najukkani unammilligassat periarfissallu annertunerusumik paasisaqarfigineqarnissaat ataatsimiititaliap angalanermini siunertaraa. Tikeraarnerit aaqqissuulluagaallutillu imaqarluarput aammalu ataatsimiititaliaq paasissutissanik sulissutigeqqitassaminik pissarsilluni.

Ataatsimiititaliaq ataatsimiinnerit nalaanni ilaatigut tunitsiviit, aalisarnermi atortut aalisarnermi pissutsit ataatsimut isigalugu pitsaanerusut pillugit kissaatinik apuussivigineqarpoq. Taamatuttaaq nannuttassiissutit, qilalukkanik qaqortanik aammalu qilalukkanik qernertanik pisassiissutit tikeraarneqartuni initupput.

Najukkani innuttaasut tusarneqarnissaat ataatsimiititaliamit annertuumik pingaaruteqarmat inuussutissarsiutitigut tapersiisarnerup aammalu inuussutissarsiornermut taarsigassarsinissamut periarfissat pitsanngorsarneqarnissaat kiisalu Tunumi aalisarnermik piniarnermillu ineriartortitsinerup nukittorsarneqarnissaa pillugu Naalakkersuisunut kaammattuummik ataatsimiititaliaq aamma nassiussaqarpoq.

Lars Poulsen

Aalisarnermut, Piniarnermut Nunalerinermullu Ataatsimiititaliaq

Annertunerusumik pissarsiniaraanni ataatsimiititaliap siulittaasua una aqqutigalugu attavigineqarsinnaavoq: +299 55 18 84