Naalakkersuisut 2026-mi aningaasanut inatsisissatut siunnersuutaannut Aningaasaqarnermut Akileraartarnermullu Ataatsimiititaliami amerlanerussuteqartut qisuariaataat

Naalakkersuisut 2026-mi aningaasanut inatsisissatut siunnersuutaat Aningaasaqarnermut Akileraartarnermullu Naalakkersuisup saqqummiuteqqammerpaa. Ataatsimiititaliap Nuummi missingersuutit pillugit ukiumoortumik isumasioqatigiinnermini siunnersuut misissorpaa.

Aningaasanut inatsisissatut siunnersuut ilusissamisut inaarutaasumik ilusinivinnginnermini Inatsisartut ukiakkut ataatsimiinneranni pingasoriarlugu Inatsisartunit suliarineqartussaavoq. Naalakkersuisut aningaasanut inatsisissatut siunnersuutaanni Inatsisartuni partiinut tamanut kommuninullu isumaqatigiinniutissat annertugisassaanngitsut ataatsimiititaliamit maluginiarneqarpoq. Taamaattumillu piffissaq qanittoq eqqarsaatigalugu suliassarput ersarilluinnartoq tassaavoq pisortat aningaasartuutaannut amerliartuinnartunut aningaasaler­suutissanik nutaanik nassaarniarnissaq. Tamatuma peqatigisaanik piffissaq  ungasinnerusoq eqqarsaatigalugu pisortat aningaasaqarnerata aningaasalersornissaanut isertitassat pisariaqartut ataavartullu qulakkeerniarlugit annertuumik tamatta suliassaqartugut, aamma ingerlatseqatigiiffinni inuiaqatigiinniit pigineqartuniit. Pisortat aningaasaqarnerata oqimaaqatigiiffiunissaanik inatsisitigut pisussaaffiup eqquutsinneqartussaanerata suliassaq massakkorpiaq imaannaanngitsumillu pisariunerulersippaa.

Ataatsimiititaliami amerlanerussuteqartut maluginiarpaat nunatta karsiani isertitat ikileriarnerannik ajornartorsiummut Naalakkersuisut manna tikillugu aaqqiissutiginiagaat tassaasoq annertuumik sipaarniartariaqalerneq. Aningaasanut inatsisissatut siunnersuutip inaarlugu suliarinissaanut aallaavissagut ataatsimiititaliap isumaa malillugu imaannaanngitsortaqarput. Tamattali akisussaaffimmik tiguseqataanitsigut aaqqiissutissarsiornissaq ujartussavarput. Assigiimmik annertussusilimmik tamani sipaaruteqarnikkuinnaq ajornartorsiut qaangerneqarsinnaanngilaq. Sipaarutissat aningaasanut inatsimmi siunertanut assigiinngitsunut aningaasaliissutinik aqutsinermut qanoq kinguneqassanersut sukumiisumik isumaliutigisariaqarparput.

Ataatsimiititaliami amerlanerussuteqartut isumaat malillugu isertitsissutissanik nutaanik piaar­nerpaamik nassaarnissarput pisariaqarluinnarpoq. Isertitaqarnissap qulakkeernissaanut aali­sarneq suli kisiat annertuallaamik isumalluutigaarput, taamaattumillu inuussutissarsiornermi su­karsuit sinnerinit isertitanik aamma pissarsinissarput massakkorpiaq pisariaqartipparput. Taamaattumillu inuussutissarsiutinik siuarsaanissamut suliniutissanut, inuiaqatigiit isertita­qarnerannik pilersitseqataasussanut, pilersaarutit anguniakkallu ataatsimiititaliamit amigaatigineqarput.

Nunatsinni innuttaasut sukkasuumik ikiliartornerat, tassa assaat sulisinnaasut ikiliartornerat illuatungaanilu aningaasatigut pisussaaffiit kivitassat annertusiartornerat tatisimaneqalernissatsinnut annikillisaataanngillat. Taamaattumik unammilligassanut iliuusissat ersarissut tigussaasullu ataatsimiisitaliamiit kissaatigivagut takussallugit.

Ataatsimiisitaliamiillu amerlanerussuteqartuniit maluginiakkatta ilagaat piffissami matumani, annertuumik sipaarniarfiusussami Inatsisartut siulittaasoqarfiat kisiartaalluni tamakkiisumik akitigut nalimmassaalluni qaffaanissaminik ingerlatsivigineqarnissaminik kissaateqarsimanera.

Naggataatigullu ataatsimiititaliami amerlanerussuteqartut iluarisimaarpaat aaqqissuusseqqinnissat attassiinnarnissamut ineriartortitsinissamullu pilersaarut II-mi saq­qummiunneqartut qanoq piviusunngortinneqarnissaat aammalu inuiaqatigiit inuillu anin­gaasaqarneranni, inuussutissarsiornermi suliffeqarnermilu, peqqinnissaqarfimmi aammalu inuusuttunik ilinniarnermillu suliassaqarfimmi ajornartorsiutit kiisalu inuiaqatigiinni sanngiinnerusortatta unammilligassaat Naalakkersuisunit qaqugu minnerunngitsumillu qanoq aaqqinneqalersaarnersut ataatsimiititaliamit pissangatigineqarpoq.

Annertunerusumik pissarsiniaraanni Aningaasaqarnermut Akileraartarnermullu Ataatsimiititaliap siulittaasua,
Erik Jensen, una aqqutigalugu attavigineqarsinnaavoq:  +299 53 04 08.